無可否認，呢個世界就係咁唔公平——同一件衫，唔同身形、髮型同容貌嘅人著，真係會有截然不同嘅感覺（畢竟無對比就無傷害嘛，哈哈）。不過，總有幾個類別嘅衫，真係超級考驗身材，無天仙咁靚同魔鬼咁嘅身材，著咗就係一個悲劇，嘥錢又嘥心機！

今次小編根據訪問身邊嘅人+親身慘痛經驗，同大家嚟個雷品大賞，盤點4款買咗絕對會後悔嘅女裝單品，睇下你有無中槍！

雷品1：偽女神裝

所謂偽女神，並非指本人，而係指件衫。至於咩算偽女神裝，睇圖感受下。

但凡呢類偽女神裝，驟眼睇好吸引，點知買翻去其實無幾可會著。點解？其實只要你有少少肥、少少矮、腿少少短、patpat少少肥，著上身都未必好睇。

需知帶有比較繁複花樣點綴如蕾絲、流蘇等嘅款式，除咗需要好嘅硬件（如身形），一個啱主題嘅妝容、髮型亦非常重要，因此整體造型度需要高度配合先會好睇。

試想像一個著住偽女神裙但個頭亂過鬼、個妝又唔精緻嘅女仔行出嚟，比人感覺只會係不倫不類，絕對衰過就咁T恤牛仔褲。所以，咁麻煩又精緻嘅款式，不了。（當然，如果你對自己身材樣貌有自信，著上身真係會好睇）

雷品2：直筒無腰寬鬆長裙

小編知道，呢個款寫出嚟大概好多人會反對，因為呢個款正正係文青或森系女仔最鍾意嘅單品之一。咩話？唔緊身都唔得？係，而且其實要求同樣高。

唔知大家有無留意過街上現時好興嘅闊腿褲，高瘦嘅人著係真係好睇飄逸，但如果下半身肥或者高度唔夠，其實效果真係差少少。

直筒無腰寬鬆長裙道理一樣，甚至要求更高，只要你頭嘅比例較大、肩比較削、身高比較矮，再著上無曲線嘅長裙，簡直cosplay哈比人。不過如果你注重熟悉度多於時尚度，咁可以當以上全係廢話。

曾幾何時，熒光色潮流風靡全球，唔單止衫要sharp色，連妝容都要熒光色嘴。同樣道理，膚色白嘅人著真係好睇，仲顯得更白；但膚色黑著，只會顯得更黑。

如果你屬於下半身唔太fit嘅女仔，強烈建議盡量避開呢類單品，因為飽和度高嘅下裝會凸顯放大patpat位及粗腿。

加上上身非常難配襯，就算最基本的淨色黑白灰都未必好睇。

睇住無數韓星明星著魚尾裙著得又高又性感，的確會心動，不過好多時買到翻屋企，就察覺原來魚尾裙對腰、臀圍、肚腩、小腿嘅要求極高。不但要小蠻腰、翹蜜桃臀、長腿，仲唔可以有肚腩，而且一定一定要襯高跟鞋，否則特別顯矮之餘，肚腩一出曲線盡毀，臣妾真的做不到啊！

此外，魚尾裙女人味太重，而且比人感覺有啲隆重，所以只能係比較正式場合配置高規格妝容和髮型，造型先會優雅。

因為魚尾裙如此難駕馭，所以結果往往悲劇收場，係屋企角落封塵。