《Minecraft》（我的世界）推出至今接近17年，玩家終於唔使再利用礦車、船隻或者盔甲架，扮出角色坐喺椅子上嘅效果！Mojang 在 Minecraft 26.3 Snapshot 3 測試版正式加入全新「坐墊」（Cushion），令玩家可以真正坐低，配合樓梯、半磚等方塊，自由設計沙發、吧檯椅甚至國王寶座。
除咗備受期待嘅坐下功能，Minecraft 26.3 更新亦加入適合戶外探險嘅「乾草床」（Straw Bed）、全新「斑駁森林」（Dappled Forest）生物群系、白楊木系列方塊及廢棄營地等內容。以下為大家整理今次 Minecraft 26.3 更新重點、坐墊合成方法及新道具用途。
**注意：**以下內容目前屬於 Minecraft Java Edition Snapshot 測試版本，正式推出前仍有可能調整。
Minecraft 26.3 更新重點
今次 Minecraft 26.3 測試版主要圍繞「露營、探索及建築」主題，重點內容包括：
- 全新可乘坐道具「坐墊」
- 16款坐墊顏色
- 一次性睡眠道具「乾草床」
- 全新生物群系「斑駁森林」
- 白楊樹及完整白楊木方塊系列
- 全新廢棄營地結構
- 羊毛樓梯及羊毛半磚
- 架生菇及紅色灌木等新植物
Minecraft 終於可以坐低！全新「坐墊」登場
過去玩家可以瞓床、坐礦車、划船，甚至騎住豬四圍走，但一直冇辦法直接坐喺自己建造嘅椅子上。因此，玩家只能將礦車或者船隱藏喺樓梯下面，製造角色坐低嘅視覺效果。
Minecraft 26.3 Snapshot 3 終於加入正式坐下功能。玩家只要將坐墊放喺合適位置，再與坐墊互動，就可以令角色直接坐低，毋須再使用複雜嘅紅石機關或者隱藏礦車。呢項功能雖然簡單，對 Minecraft 建築玩家而言卻非常實用。無論係客廳沙發、咖啡店座位、酒吧高腳椅、露營區，定係城堡入面嘅國王寶座，都可以真正畀角色坐上去！
Minecraft 坐墊點整？合成方法一覽
Minecraft 坐墊共有遊戲內全部 16種羊毛顏色，玩家可以按照家具風格自由配搭。
坐墊合成材料：
- 3個相同顏色嘅羊毛半磚
- 可以製作對應顏色嘅坐墊
例如使用三個紅色羊毛半磚，就可以合成紅色坐墊；改用藍色、白色或者黑色羊毛半磚，亦會製作出相應顏色版本。配合今次同步加入嘅羊毛樓梯及羊毛半磚，玩家可以更容易建造梳化、扶手椅及其他柔軟家具，令室內設計更有層次。
坐墊可以放喺邊度？
坐墊可以放置喺大部分平坦表面上，而且本身冇碰撞箱，因此能夠與多種方塊及物件重疊，只有其他坐墊例外。
官方公布嘅坐墊放置規則包括：
- 可以放喺任何平坦表面
- 會貼合承托方塊頂部
- 本身唔會移動
- 底部承托方塊被破壞後，坐墊亦會跌落
- 冇碰撞箱，可以與其他物件重疊
- 同一位置唔可以重疊放置另一個坐墊
呢種設計令玩家可以將坐墊放喺樓梯、半磚及自製家具上，毋須受傳統完整方塊限制。
乾草床登場：瞓覺唔會更改重生點
除咗坐墊，Minecraft 26.3 Snapshot 3 亦加入全新「乾草床」（Straw Bed）。呢件道具特別適合需要長途探險、尋找村莊或者離開基地挖礦嘅玩家。
乾草床可以讓玩家跳過夜晚，但唔會更改原本設定好嘅重生點。換句話講，玩家可以放心喺野外瞓覺，死亡後仍然會返回原本基地附近嘅床，而唔係被傳送到臨時露營位置。
乾草床合成方法：
- 使用3個乾草捆
- 一次可以製作4張乾草床
不過，乾草床屬於一次性消耗品，使用一次後就會消失。如果玩家嘗試喺地獄或終界使用，乾草床亦會被破壞，因此出發探險前最好準備多幾張。
全新 Dappled Forest：探索白楊樹與廢棄營地
Minecraft 26.3 更新另一項焦點，就係全新生物群系 Dappled Forest（斑駁森林）。斑駁森林主要生成喺寒冷生物群系附近，擁有紅色、橙色及黃色樹葉，整體景色充滿秋日氣氛。
玩家可以喺斑駁森林發現：
- 白楊樹及倒下嘅白楊樹幹
- 紅、橙及黃色白楊樹葉
- 白楊木建築方塊系列
- 架生菇
- 紅色灌木
- 落葉裝飾
- 廢棄營地
- 羊、雞、牛、豬、兔及狐狸
三種白楊樹葉各自擁有相應顏色嘅落葉粒子效果，而白楊樹苗成長後，則會隨機變成其中一種顏色，為森林及玩家自製花園帶來更多變化。
廢棄營地加入更多探索元素
全新廢棄營地唔只會生成喺斑駁森林，亦可能出現喺櫻花樹林、草甸、樺木森林、針葉林、竹林、沼澤、莽原及蒼白之園等多種生物群系。
每個生物群系嘅營地外觀都會有所不同，玩家亦可以喺部分營地內找到裝有戰利品嘅箱子及木桶，令野外探索變得更加有驚喜！
Minecraft 26.3 幾時正式推出？
目前坐墊、乾草床及斑駁森林仍然屬於 Minecraft 26.3 Snapshot 測試內容，主要開放畀 Java Edition 玩家試玩。Mojang 暫時未確認完整正式版推出日期，而測試期間嘅合成方法、功能及數值仍有可能改動。
不過，從目前公開內容嚟睇，Minecraft 26.3 對建築及生存玩家都相當實用。坐墊令角色真正坐上家具，乾草床解決野外睡眠會改掉重生點嘅問題，而斑駁森林就帶來更多建築材料及探索地點。對苦等多年嘅老玩家而言，史蒂夫終於可以放低工具，好好坐低休息一下！
